أصل الواد بيحب بهيَّه ..
شعر : ايمن عبده
حسكن قلبك
واعمل حجر لروحي ف نبضك
يسكن أرضِك
واعزل نفسي من الأيَّام الناوية تخاصمك
أصل حضانة حبك فيَّا لطول العمر
ساكن حلمي وحلمك فيها بأمر الشوق
مين في الحلم الحلو اتمنى بإنَّه يفوق!!
و انا والله يا روح الروح
عارف إن العزل الجبري يساوي الضوء
عارف إن الطب بيعجز قدَّام نورِك
كل بحور الشعر بتغرق
لمَّا بتنوي ف مرَّة تزورِك
ما انتي البحر اللي بتتوزَّع منَّه الصورة
وانتي دراما لمشهد شاهد معنى العمق ف عمق المعنى
وانتي الوزن المضبوط جدآ للأبيات
والسنوات الصابرة موسيقى ومش مكسورة
وانا مشتاق الحجر الصحِّي ف قلب ديوانِك
محتاج مشفى يرتِّب كل قصايدي الهابطة
يربط كل المحتاج منِّي لمليون ربطة
يفتح كل روابط عمري
لجل يفك الحرف الساكن والمتشفَّر
خلف المعنى اللي بيتأخَّر عن مواعيده
يمكن يقدر عزلي ف قلبِك يحمي الشعر من الشيطان
يطرد فيروس كان بيزاول مصل هواكي
وقت ما كان الشارع فاضي
قبل ساعات الحظر بساعة
قبل صلاة العصر بتجري خطاوي الروح
علشان تلحق آخر موكب رايح ليكي
كنت انا خلف الموكب ساكن نن عينيكي
ساكن قلبك قلبي الساكن فيه النور
والتحليل اللي بيتحلل كلَّه ف دمِّي
كل نتايجه كانت إيجابية
قالوا يتم العزل الجبري
أصل الواد بيحب بهيَّه
---------------
أيمن عبده
