(طبْع الزّمان)
ولسّه يا قلبي بتغازل
عشانه الليل
تخبّي الدمع وتعافِر
ونازل شِيل
زرعْت بسرعة أحلامك
فى أرضه البور
حصدت الدمع أيامك
بقيت مكسور
ومش عارف تروح على بر
أدآن المجْروحين أدِّن
بدعوى من صباح
قفّل شبابيكه ف وش الضيّ
ّ يا قلبي حيّ ع الدمعة
ومليون حيّ
بتعْلِن ع الملأ توبه
تقول ديّه آخر نوبة
وطوبه بعدها طوبه
بتبْني بيها بكره الجي
يا شمس غريبه بتْزيدي
الوجع وجعين
مفيش مرّه تشوفي عنيّا ف
الشّبّاك إلا وتنْدهي عليا
حبيبك فين
حبيبي فايتْني مجروحة بقالُه سنين
حبيبي ف قطر رُكّابه كما النيكوتين
سايِب مرْكِبي ف البحر وحْديْها
وأهو اخْتار إنه يغرق
فى دموع العين
همومه بتشبه الإدمان
وجرْعات الأمل مش قادْرة تِداويها
ولا ضحْكه ولا تهريج
كإنه من الجروح خرّيج
بتقدير عالي من بكره
ياسيدي العشق زاد يكْفيك
وإحنا من السنين ذكرى
جيفارا جي يتْحدّى دروب الخوف
ف سيبْله بيْبانّا متواربه
قلوبنا من الوجع شاربه
ف ليه بأدينا نسقيها مرار وعذاب
طِلع طبْع الزمان قلّاب
آمنّا بحبنا ديمًا
ف يوم لمّا الحبيب جالنا
ايمان راسِخ وده حالنا
فراح ف الحب راس مالنا
وجانا خراب
تعالى حبيبي نتعاهد
ورود العشق نحييها
نخلّيها كما الجنّه
كما الجنّه نخلّيها
فوجئت ب وردة دبْلانه
وقفله حزينه لقصيده
يقول فيها بإنه فراق
فراق ب فراق مهيش فارقه
سنين العشق جت طارئه على قلوبنا
وبكره هاترجع الأحزان
يا ليل الموجوعين عطْشانه
فاسْقيني
يا فجر همسْ لي ف وداني
قومي بسرعه صلّيني
وعهد عليا أرجّعْلِك
حبيب عمرك
فَرشت العمر سجاده
وخلّيت الأمل عرفات
لا سهم حبيبي صاب قلبي
ولا خطّيت جبل عرفات
ولا بإيدي أعيش على ذكرى دبّاحه
ولا كان قصْدي أكون ف الجرح سوّاحه
ساعات الذكرى تؤمرْني
أكون ليها
ساعات بهرب ف ضواحيها
وبابني ف حلمي وباعلّي
وبانزل ألاقي بردو مفيش
كأني واحده م الحرافيش
طوتْها سطور نجيب محفوظ
ساعات فيروز تِغنْيلي
يا طيره طيري يا حزينه
قلوبنا بتشْبه الزينه
برغم البعد والقسوه
بتسْعِد خلق حواليها
بتشكي كتير
كتير ساكته
وآهه ف جوفها تِداريها
أنا والجرح ذي إخوات
عَشمْنا ف حب كان سماوات
لأرض كبيره مفروشه
ب ضي حبيب
ودنيا العشق دي يانصيب
وليها نصيب حيطان بيتْنا
تكون هيه السند والأهل
تحابي علينا لمّتنا
وحُب الحيط مهوش بالسهل
أنا اللي من مرار الحب
بشْبه كهل
وبتْعكّز على بيتي
وجنب البيت
زهور نرجس بدون أشواك
طيور الحب بترفرف على الأحلام
بترسم لوحة من بكره تقول فيها
غدًا ألقاك
وخلف اللوحه مكتوب إن دي أوهام
نورا يحيى
