"رَوَّح ياغريب" للشاعر محمد حجازي
رَوَّح ياغريب
من ديواني ( غناوي ست الحزن)
الإهداء : إلى كل رفاق وجع البعاد و رفاقهم
روَّح يا غريب على بلد الحبيب
بكرة جَي دورنا والجروح تطيب
سلِّم ألف مَرَّة على كل دار
والله الغُربة مُرَّة والفراق لهيب
* * *
احضن السواقي وانشر ع الجريد
للأرض الشَرَاقِي فستانها الجديد
وإن سألوك علينا ودا مش بعيد
قول لسة لنا باقي في التَغرِيبَة عيد
ومتنساش تِمَلِّي للعيال تَمَلِّي
ياشموسة طُلِّي د اللي جَي قريب
* * *
خَلِّي الصبر راية والنصيب معاد
غني مع الصبايا واحلم للولاد
حَنِّي كفوف بلدنا من خير الحصاد
علشان لما نرجع نلقى الشوق وزاد
واتمنى لنا لَمَّا نرجع تاني لَمَّه
زيك نلقى ضمة تهون العَصِيب
* * *
بوس لينا الأيادي وقولها بأعلى صوت
من بعد السنادي راجعين يا البيوت
د احنا ف غربة مُرَّة وكل لحظة موت
وأعلى صوت في الغُربة أوطى من السكوت
سَلِّم ع البلابل لما تروح تقابل
نسمة المشاتل على جسر النصيب
