كفاية دفي
بقلم : طارق الامبابي
كفاية دفي الحل مش في بطانية
نعطيها لأسره فقيرة ولا كيس سكر
ورز وزجاجه زيت
الحل مش جنيه أو خمسه جنيه لمصر
الحل مش عشرين إلف جنيه
لأسره توفي عائلها أو ابنها في السيول أو حادث قطر
الحل مش ترقيع وشحاتة
الحل انك تشتغل يا شحاتة
الحل انك تقفل علي بلدك وتعيش علي قد لحافك
مش لازم نستورد الغالي والرخيص لو بلدك مش عارفه تنتج سيارتها يبقي مش لازم تركبها
لو مش قادرة تنتج جهاز كمبيوتر يبقي خليها عايشه علي أرشيف عم حمزة ونعد علي طوابعنا
لو مش قادرة تنتج تلفزيون يبقي كفاية عليها الراديو
لو مش قادرة تصنع لمبة ومفتاح وفيشه يبقي كفاية عليها لمبة الجاز لو هي بتنتجها وخايف أقول شمعه لا نكون مش عارفين ننتجها
لو مش قادرة تصنع إبره يبقي مش لازم نلبس فستان وبدله
لو مش قادرة تزرع قمح يبقي مش لازم نأكل عيش
شعب مش يشتغل وينتج يبقي يستأهل يعيش في الضلمه وكفاية عليه لمبة جاز أو شمعه
لما نعرف نزرع يبقي من حقنا نأكل لو نعرف نصنع يبقي من حقنا نبقي شعب يستأهل يستمتع بصناعته
عاقبوا الشعب بوقف كل متاع الحياة وترفها ها تلاقوه فاضي يبنيها من أول وجديد وساعتها ها نبقي دوله
