مواقف في حياتي

بقلم /سما رامي 

في هذا الوقت من العام كلنا أو أغلبنا في الجو البرد ده قاعد في بيته مدفي ومرتاح ، في ناس كتير حوالينا لقيت نفسي بفكر فيهم..

فكرت في أهالي سانت كاترين إللي السنة إللي فاتت زي دلوقتي كان عندهم أمطار وسيول كتير هدت بيوتهم ، ودمرت حياتهم ، وسافرت مع حملة بنكمل بعض، ومعايا ناس جميلة بتحب مصر ، وبتحب الخير، وبتحب تساعد الغير.

ومعايا كمان أصحابي الأبطال.. أصحاب الهمم روحنا هناك ووزعنا عليهم ملابس وبطاطين فرحناهم وفرحنا معاهم ، وعرفت وقتها إن فرحتهم بينا مش عشان الملابس والبطاطين ، فرحتهم كانت عشان لقوا ناس بتحبهم وحاسيين بيهم ولأول مرة أعرف يعني إيه تدخل الفرحة والسرور لقلب حد محتاج بس تحضنه وتحسسه إنك معاه وحاسس بيه وتحس كمان بنعمة ربنا عليك إنك نايم في بيتك مدفي ومطمن...

وفكرت كمان في رجالة بلادى وجيش بلادى ، في الوقت البرد ده قد إيه هما واقفين يحمونا ويدافعوا عننا ومابيناموش عشان يوفروا لينا الحماية والأمان ، وفي عز البرد واقفين أسود يدافعوا ويحموا الأرض والعرض..

بدعي لكم ربنا يحميكم ، ومن أي خطر يحافظ عليكم، وفكرت كمان في الغلابة إللي في الشوارع ، إللي سريرهم الرصيف ، وغطاهم مجرد الهدوم إللي عليهم ، وبابا كان دايما بيقولي إن ربنا فرض علينا الزكاة والصدقات عشان ما يبقاش في فقير أو محتاج، لو كل واحد فينا طلع الزكاة والصدقات مش هيكون فينا محتاج، ولو كل إنسان فكر في أخوه الغلبان مش هيكون في حد محتاج أوغلبان.

لازم نفكر في بعض ونساعد بعض ونشكر ربنا على نعمه الكتير علينا، محتاجين شوية إنسانية عشان الكل يعيش بكرامة وإنسانية.