إختلافي بيميزني
بقلم/ سما رامي
من يوم ما كبرت وإبتديت أفهم وأنا حاسه إن فى حاجة غريبة مكنتش بحس الإحساس ده طول ما أنا وسط الناس إللى بيحبونى.
لكن كل ما كنت بكبر وبعرف ناس أكثر كان فى حاجات كتير بتتغير.
مواقف بتحصلي كانت كتير بتضايقنى، نظرات غريبة ومعاملة مش فهماها.
في النادي أروح العب ألاقى طنط بتبعد بنتها عني ولاتريدها أن تلعب معايا ولا تقرب مني ولقيت مامي بتجرى عليا وتقولى تعالى أنا هلعب معاكى.
ومواقف زى كده كتير كانت بتحصلى في المدرسة ودايمًا مامي كانت بتقولى إنى جميلة عشان كده كل الناس بتبص عليا لكن الحقيقة عرفتها بعد شوية إنى مختلفة ربنا خلقنى بكروموسوم زيادة مش موجود عند كل الناس هو نفسه الكروموسوم جعلني أحب كل الناس اللى مستغربين من شكلى ، مامي قالتلى إن ربنا بيحبنى أوى وهى كمان بتحبنى أوي ولقيت نفسى راضية بنفسى وبحب شكلي وبحب ربنا عشان هو مش بيخلق حاجة وحشة وفهمت كويس إن العيب مش فيا أنا لكن العيب في الناس إللى حواليه إللى بيصروا يعاملونى علي إنى مختلفة.
أيوة أنا مختلفة بحب الحياة وبحب الناس كلها ، بتقن كل حاجة بتعلمها عشان بحبها وعلى قد ما أقدر بحاول أتعلم وأفهم، لكن الشئ الأكيد إنى مميزة.
أيوة إختلافى بيميزنى..... ومامى علمتنى حاجة جميلة أوى..... إن ربنا خلقنا مختلفين عشان نكمل بعض...
أنا مختلفة.... أنا مميزة .
