حوار مع نور البكرى و أسرار العلاقات
حوار / زينب فتحي
كوني له أنثى يكن لكي رجلا طول الوقت بنعاتب الرجل علي إهماله ، خيانته ،
سلوكه مع الأنثى
طب عمرك سألتي نفسك هل أنتي فعلا أنثى له كما يجب؟
تلبي له إحتياجاته بحب وليس ضعف منك..
وعشان كده حواري النهاردة مع الجميلة / أستاذة نور البكري
صاحبة حملة جرعة أنوثة.وكان هذا الحوار الأنثوي الممتع في البداية سألتها :
مين هي نور البكري؟
إنسانة عندي رسالة في الأرض لوجه الله ، إتخرجت من كلية آداب قسم أنثربولوجي دورت علي اكتر حاجة انا مميزة فيها لقيتها جزئية العلاقات وكنت بساعد الناس وبساعد نفسي في نفس الوقت وجوايا حاجات كتير اقدمها للناس.
إمتى قررتي تخرجي جرعة أنوثة للنور وليه؟
الفكرة كانت من حوالي أربع سنوات لما إكتشفت إني عاوزة أفيد الناس وأخلي الناس أسعد لأني كنت طفلة لأبوين منفصلين وكان جوايا إحساس إني مش عاوزة ده يتكرر مع حد و حبيت الناس تعيش في علاقاتها بشكل سعيد سواء زواج أو إنفصال أو حتى سنجل
بدأت أفكر إيه هي الأسباب اللي بتخلي الرجل يبعد عن فطرته والأنثى تبعد عن فطرتها وبقى تركيزي أكتر على الأنثى وإنها إزاي ترجع للفطرةاللي ربنا خلقها عليها فجاتلي فكرة جرعة أنوثة وده كان السبب الرئيسي.
لفت إنتباهي في كورساتك تعبير الأنثى القشرة مين هي؟
هي الأنثى اللي بتهتم بالمظهر الخارجي أو الإغواء وتظن إن هي دي الأنوثة ودى حاجة سطحية جدا لأن الأنوثة داخلية وخارجية.
إيه هي علامات الرقي الأنثوي؟
بتكون متعاطفة أوي وبتقدر تعطي للشخص الآخر إحتياجاته بشكل راقي بدون ماتشعره إنها أفضل منه بتعطي بدون مقابل وفي نفس الوقت محافظة على تقديرها لنفسها وبتدي لنفسها قوة وبتحافظ علي مشاعر الأخرين وتحترم تفكيرهم.
هل حسيتي بتجاوب وتغيير من البنات بعد حضورهم لكورساتك؟
الحمد لله في بنات وزوجات بشهادة منهم حياتهم إختلفت بس لازم أأقول إن الفضل مش لكورساتي فقط لكن مع مجهودهم في التطبيق وأنا بعتبر الكورس وسيلة مش سبب.
هل فيه أفكار جديدة تقدري تقدميها في مجال العلاقات؟
حاليا بحضر كورس أون لاين فكرته مختلفة محدش عملها قبل كده بإن هيبقى فيه جزء تمثيلي مش مجرد معلومات عشان المعلومة توصل بشكل أسهل وأبسط وأنا لسه مخلصة كورس جميل ومفيد جداا وفيه بعلم الأشخاص إزاي يعالجوا أنفسهم بأنفسهم بأنه يتعلم إزاي يتعامل مع مشاعره بتقنية البيت وهي تقنيات قوية جدا بتساعد على تخطي الصدمات وإزاي تكون أقوى نفسيا..
طول ما الشخص عنده شغف بالشئ وماشي في الطريق طول مابيجيله أفكار جديدة.
مين أكتر حد شجعك علشان تكملي وساعدك على النجاح؟
الناس اللي بتبقى أحسن بعد الكورسات هما اللي ساعدوني عشان أكمل.وقبلهم ربنا طبعا دايما بستمد قوتي من ربنا عز وجل هو اللي بيبعتلي ناس تشجعني بنتايجهم الحلوة.
إيه أكتر نقد إتقالك أوهجوم على جرعة أنوثة؟
في البداية تم الهجوم عليه جداا من ناس كتير لأنهم أساءوا فهم الكورس مش فاكرة أكتر نقد إتقالي بس اللي حصل إني ركزت على هدفي والنقد بدأ يقل لحد ما أختفى.
ياترى رد الرجال من جرعاتك كان إيه؟
كان فيه رد إيجابي بلمسه لما اركب أوبر أوأكون ماشية وألاقي رجال شافوا لقائي في برنامج ويقولي قد إيه الحلقة جميلة وإنه لسه فاكرها رغم إنها من فترة وطبعا بقابل تعليقات سلبية مش بس من رجال وكمان ستات لأنهم أسأوا فهم الكورس
نور اللي بتعلم البنات ازاي يكونوا انثوات ياترى إيه هي أهم صفة لازم تكون في شريك حياتها؟
مؤمنة جداا إن الإنسان لازم يسيب الجزء ده لربنا لأنك كل ماتتوكل علي ربنا هيرزقك الشخص المناسب مع إني أجتهد لأوصل لأفضل نسخة مني بحيث لما يجي الشخص المناسب يكون هو كمان في أفضل نسخة منه لكن أهم صفة إنه يكون قوام ومسؤول وبيتقي الله لكن بيتكلم إزاي شكله إيه كلها حاجات سطحية بالنسبة لي.
لسه الكلام كتير كتير عن الأنوثة وجمالها مع نور اللي استمتعت بشكل غير عادي في الحديث اللذيذ معاها وبهدوء وجمال الحوار معاها شكرا جدااا على وقتك المستقطع لنا يانور.
