شِدِّة الغريب يا أمي
شعر: محمد عبد الرحمن حجازي
شِدِّة الغريب عَصِيبًة وكل غيبة يامة بُور
والجدور صحيح صحيحة بس ف فروعها الكسور
حد قاللي انسى ان مَنْسِي تلملمه شوية حروف
ولا مركب يوم هَتِرْسِى والعلم ع الصَارِي خوف
واما جيت أَجَمَد هزمني
إني متكتف ف دور
كل صفحة ع الجّوَاز فيها خِتْم
" جاي يزور"
أيوة يامة قالولي زاير
والتزم حٌكم الغريب
إنت ضيف و الضيف مغادر
مهما هَتْضَلِل .. مْريِب
والقَرِيب له حُكم تاني
يٌمْلُك القول ف المصاير
حَد قال لي يامة غَادِر
خَوَّخ البُوص القديم
وانت بُوصَة ف وِش وِشَّك
اتحكم عليك نِحشَّك
واشتكي الوهم اللي غَشَّك
وانت صَدَّقتُه أما قال لك
الدَفَا لِسَّاه ف فَرْشَك
والوجع ممكن يطيب
شِدِّة الغريب عَصِيبًة وكل غيبة يامة بُور
والجدور صحيح صحيحة بس ف فروعها الكسور
حد قاللي انسى ان مَنْسِي تلملمه شوية حروف
ولا مركب يوم هَتِرْسِى والعلم ع الصَارِي خوف
واما جيت أَجَمَد هزمني
إني متكتف ف دور
كل صفحة ع الجّوَاز فيها خِتْم
" جاي يزور"
أيوة يامة قالولي زاير
والغياب لَفْلَفْه زَادْ
مُؤنِة الجَايَّة اللي جَايَة
حِتَّة من وَجْع البُعَاد
يعني من حُسْن الفَرَاسَة
تِعْتِبر نَفْسَك مُودَّع
قبل ما تخَطِّي البلاد
إنت تِتوَجَّع .. دا عادي
ولما هّتدَمَّع .. دا عادي
حتى لو تِرجَع دا عادي
انت ماضي يعني عادي
لما غِبْت حَد زاد
ياااه يا أمي شفتي حالي
الضَنَا عملوه مَزَادْ !
واللي شَاريين مش كتير
ولُولَا مَظلَمة التَجَنِّي
وخوفي تيجي الغيبَة مني
كنت قلت معدش حَد
إلا ومفكرني ديب
شِدِّة الغريب عَصِيبًة وكل غيبة يامة بُور
والجدور صحيح صحيحة بس ف فروعها الكسور
حد قاللي انسى ان مَنْسِي تلملمه شوية حروف
ولا مركب يوم هَتِرْسِى والعلم ع الصَارِي خوف
واما جيت أَجَمَد هزمني
إني متكتف ف دور
كل صفحة ع الجّوَاز فيها خِتْم
" جاي يزور"
أيوة يامة قالولي زاير
وانتظارك شيء يضايق
حاجة بِتغُص النفوس
لُقمِة الغَرِيِب تضايق
حتى لو من غير غُموس
يا الغريب يا مرَازِي فينا
سِنتَك قيد ع التُروس
جَرَّب الصوم عن حياتنا
وانتظر مَغْرِب يجيك
اخصِم النوم من بِيَاتنَا
احنا مش قَيلُولَة ليك
اللي ليك .. سَاعِة مُجَامْلَة
جُمْلة ساكتة وجملة ضايعة
بيعَة بالقطاعي عَاملة
صفحة كل حروفها بَايعَة
هو يامة سُوق بَلَدْنَا كيلُه طَف
ولا وَزَّان القَرَابَة عَقْلُه خَف
ولا أنا اللي برأيهم لازم أغيب
شِدِّة الغريب عَصِيبًة وكل غيبة يامة بُور
والجدور صحيح صحيحة بس ف فروعها الكسور
حد قاللي انسى ان مَنْسِي تلملمه شوية حروف
ولا مركب يوم هَتِرْسِى والعلم ع الصَارِي خوف
واما جيت أَجَمَد هزمني
إني متكتف ف دور
كل صفحة ع الجّوَاز فيها خِتْم
" جاي يزور"
أيوة يامة قالولي زاير
واللي لك .. تُرْبَة وعَزَاك
عاين الرَقْدَة وسَاوِيهَا واروي صَبَّارتَك أَسَاك
وأما صَنْدُوقَك يِجِينَا بجتِّتَك وابنك معاك
هَنتَاوِيِك ونوَاسي ضيفَك
م العَزا لحَد السُبُوع
بس أَكِّد له ان أَخْرُه
بينَّا "تذكرة الرجوع"
أَصْل فَرْع الفَرْع حُكْمُه
زَي حَالتَك .. نومَة بَس
لُه يزُورَك لَجْل إِسمُه
بَس ما يطلَع لُه حِس
وأما يِتجَهَّز لِيومٌه
جَنْب منك بَرضُه نومُه
لَو حَصَل ولُه نَصِيب
شِدِّة الغريب عَصِيبًة وكل غيبة يامة بُور
والجدور صحيح صحيحة بس ف فروعها الكسور
حد قاللي انسى ان مَنْسِي تلملمه شوية حروف
ولا مركب يوم هَتِرْسِى والعلم ع الصَارِي خوف
واما جيت أَجَمَد هزمني
إني متكتف ف دور
كل صفحة ع الجّوَاز فيها خِتْم
" جاي يزور"
أيوة ياما قالولي زاير
بَس نِسْيوا إنك بِيَاتي
والمَلاذ لابني المشَتَّت
بين صُرَاخ عيني وسُكَاتِي
لما أَمُوت عَدِّي بُه يامة
م اللي فَات لكل آتي
عَلَّمِيه يكبر ف لَمَّة
حَنَّنِيه ف أمه و بناتي
واما تاخديه للمقابر
لبسيه التوب اللي شَبَهِي
فهميه إني عشت صابر
ع الأذى وكلمة غريب
شِدِّة الغريب عَصِيبًة وكل غيبة يامة بُور
والجدور صحيح صحيحة بس ف فروعها الكسور
حد قاللي انسى ان مَنْسِي تلملمه شوية حروف
ولا مركب يوم هَتِرْسِى والعلم ع الصَارِي خوف
واما جيت أَجَمَد هزمني
إني متكتف ف دور
كل صفحة ع الجّوَاز فيها خِتْم
" جاي يزور"
