حتى لو سكت الكلام

شعر  أيمن عبدة - مصر 

سكت الكلام

والشعر منَّك يا حبيبي زي ثورات الغرام
والحرف مش ناوي الصيام
ناوي يكمِّل رحلته لآخر بيوت العارفين
وبرغم إن الناي حزين
الغنوة مليانة بأمل
واللحن بيهز ف شجون المطربين
كل الحروف الصادقة بتجيب الطرب
كل المعاني الحلوة بتشد الصَّباح
ف لك صباح الخير وشمس ف حضنها
ولك شروق الفجر لمَّا يضمَّها
نسايم الصُّبح اللي شقشق ع البيوت
وريحه هَلَّه من الغيطان الدايبة في عيون الطيور
سكت الكلام اللي ابتدى يبني ف قصور
وإيدين بيطرح نبتها من ألف نور
وإيدين بتنطق بالشَّقا موَّال بلاد
وتغنِّي لا للحزن لا لا للدُّموع
وتقيد شموع الانتصار
فوق القلوب المطمئنة للنَّهار
الشعر منَّك يا حبيبي كل أبياته انبهار
الشعر من قوت الوطن يغزل بطل
ويلم أبطال المدائن زي حبَّات الياقوت
ويلملم الحزن اللي سارح في البيوت
ويعلَّق الزينة ف شوارع كل حارة من الحارات
ويغنِّي لا للحزن لا لا تبعدونا
"لا تكونوا أقسى فرضآ من كورونا"
إمتداد الشعر ممتد الجذور
حتى لو سكت الكلام
تلقى قلب الشعر يشبه حبل نور