تعرف على طريقة العزل المنزلى الآمنة...... بقلم د.فراج هارون
بقلم : د.فراج هارون
مستشفيات العزل نوفر سريرها للحالة المريضة، نتعلم كيفية عمل غرفة عزل في بيتى ؟
برتوكول العزل المنزلى الآمن :
أولًا : وحضرتك بتختار الغرفة خليك حريص أن يكون فيها مصدر للشمس لأنها مهمة جدًا.
ثانيًا : هتضع في الغرفة أكياس زبالة بقدر كافى.
ثالثًا: هتضع فيها جونتات وماسكات ومناديل وكحول بقدر كافى.
رابعا: هتضع فيها فوط وملابس وملايات للشخص المعزول بقدر كافى.
خامسًا: لو فيه أمكانية لوسيلة للتسلية للشخص المعزول مثل شاشة تليفزيون أو لاب توب.
سادسًا: العلاج الذي يستخدمه الشخص.
سابعًا : ترمومتر ديجتل.
لو تقدر تفصل الحمام الذي يستخدمه الشخص المعزول عن باقى الأسرة يكون أفضل.
كيف يمكن لنا التعامل مع الشخص المعزول داخل الغرفة؟
حضرتك هتقدمله الأكل الكافى يوميًا في أطباق كرتونية ذات الاستخدام لمرة واحدة وتترمى ف كيس قدام الغرفة وفي نهاية كل يوم الشخص هيحط كل البواقى في كيس ويربطه ويضعه في كيس آخر ويضعه أمام الغرفة.
حضرتك وأنت لابس كل سبل الوقاية هتأخذ الكيس ترشه كلور من برة وتضعه في الاماكن المخصصة فورًا.
كيف يذهب للحمام؟ قبل ما يخرج هيتصل بحضراتكم هتفضوا الطريق للحمام وهو خارج بالماسك والجوانتى وأإيده جانبه لا يلمس شيء، هيستخدم الحمام وبعدين حد من حضراتكم هيلبس الوقاية ويطهر الطريق والحمام بتركيز الكلور المتفق عليه.
كيف يمكن متابعة حالته الصحية ؟
عن طريق التليفون وهنعلمه يقيس الحرارة بالجهاز الدجيتل ويبلغنا الحرارة كل ٨ ساعات ولو فيه أى أعراض جديدة.
افرض إن ملابسه تحتاج للغسيل ؟
هيضعها في كيس بلاستيك ويقفله كويس وهيضعه أمام الغرفة وشخص منكم هيلبس لبس الوقاية ويأخد الكيس على الغسالة وبعد ما يغسل الملابس، الغسالة تاخد دورة كلور التعقيم، ودرجة الحرارة العالية والمسحوق كافيين جداً لتعقيم.
بالنسبة لتعقيم الغسالة نفسها بعد غسيل المريض، دورة الكلور تكون إننا هنشغل الغسالة على اقصر برنامج وهى فيها قطعة قماش وحدة لسنا بحاجة لها ونضع مع المسحوق كلور أو كلوركس.
طب افرض وحشنا؟
فيه اختراع اسمه الفيديو كول جميل والله، هدفك في العزل المنزلى أن باقى أفراد الأسرة لاتصاب بالفيروس. واختراع الفيديو هتحاولوا تشاركوا بيه الشخص المعزول في كل حاجة بتعملوا من أجل حالته النفسيه.
