روبابيكيا
شعر : صادق أمين صادق ـ الأسكندرية
روبابيكا
مين راح يشترى
عندى قلب طراز قديم
وكتاب حكاوى مالوش غلاف
وعيون بتحلم فيها يتم
ما اعرفش يطلع كام نظام
حبه حنان وشجر برئ
عندى أمل ما لهوش جناح
وروح عليها نقوش سماح
وفكرة جت
من غير ميعاد
اكمنى فى الزمن الجديد
مبقتش أحس بطعم عيد
وبقيت باطبش فى الكلام
بقيت ليالى
وعيون على سرير السهر
ساعات بتمشئ بالبطئ
عندى انفعال فى قصيدة
لسه ماقولتهاش
وخيال له خيل
يقدر يدلك
ان ذى المستحيل
ذى السراب
ذى ابتهال الصدق
مع إنى مش ذى البياض
ما اعرفش أبدًا فى الحياد
ولا باراهن يوم تجيلى
فى أى حضن
ولا عندى غير البوح سبيل
بصيلى فاضل عندى شئ
يمكن مطوس م الغياب
يمكن مراجيح العذاب
خلتنى دايخ عن طريق
أنا عندى ذكرى ماتساويش
وعندى حلم ناقص له طيش
يارتنى سبتو يطير بعيد
اكمنى فى الزمن الجديد
مبقتش أحس بطعم عيد
بقيت قديم ذى الأمانى
وذى ما عنادك ده طعمه
جوه حلقي مش جديد
