الكهف والجمعة..وعلاقتها بالمسيح الدجّال .
بما إننا في ليلة الجُمعة ومن السنّة قراءة سورة الكهف يوم الجُمعة تعالوا ندردش شوية حول سورة الكهف ... وإيه علاقة سورة الكهف بالمسيح الدجّال ... وليه النبي صلى الله عليه وسلم حثّنا نقرأها كل أسبوع ... بل وحثّنا على حفظ أول ١٠ آيات منها
مبدئياً سورة الكهف بتحكي ٤ قصص
١- قصة أصحاب الكهف ...
٢- قصة صاحب الجنّتين....
٣- قصة سيدنا موسى مع الخضر ...
٤- قصة ذي القرنين ....
ال ٤ قصص دول بكواليسهم وأحداثهم وأخبارهم عبارة عن ٤ فتن يعني مش مجرد قصص أو حواديت تتقال قبل النوم ( فتنة الدين ... فتنة المال .. فتنة العلم ... فتنة القوة )
⭕️ أصحاب الكهف دول كانوا عبارة مجموعة شباب ( مُختلف في عددهم ) عايشين في قرية بيحكمهم ملك ظالم جبّار مفتري كان بيأمر الناس بالكفر وبعبادته هو من دون الله ... لما ربنا شرح صدورهم للإيمان مقدروش يعيشوا في هذه الأجواء من كفر وشرك وظلم وقهر للناس ... فهربوا بدينهم واستخبوا داخل كهف كبير وربنا نجاهم من هذا الملك الظالم وكتب عليهم النوم ٣٠٩ سنة ( فتنة الدين )
⭕️ قصة صاحب الجنّتين وده كان رجل كافر وكان عنده حديقتين وأنهار وزروع وفواكه ومن كل الخيرات وليلة كبيرة لدرجة إنّه اتفتن واغتر بماله ونفسه ونسي إن الل هو فيه ده محض رزق ربنا وبقى يتكبر على الفقير المسلم الل معندوش حاجة ... وفي إحدى الروايات إنّه أخوه ( فتنة المال )
⭕️ قصة سيدنا موسى مع الخضر ومقتضى القصة دي إن سيدنا موسى مع كونه نبي ولكن وجد في طريقه سيدنا الخضر وكان يملك علم وخبر حاجات هو لا يعرفها .... يعني سيدنا الخضر كان عارف ما لا يعرفه سيدنا موسى ( فتنة العلم )
⭕️ قصة ذي القرنين الملك العادل القوي الل ربنا سخرله وهيأله الأسباب وطاف الأرض كلها من مشرقها لمغربها ينشر الحق والعدل ويعين الضعيف وينصر المظلوم ( فتنة القوة )
طبعاً السورة ساردة القصص دي بشكل مبسط ويسير وغير مبهم ... وعلشان مانطولش البوست القصص دي متاحة بالتفصيل على النت
طيب النبي صلى الله عليه وسلم قالنا ( من حفظ عشر آيات من أول سورة الكهف عُصم من الدجال )
إيه بقى علاقة الدجال بسورة الكهف ؟
ال ٤ قصص الل فوق دول زي ما شفنا كده عبارة عن فتن وتحديات وابتلاءات
فلما تيجي تتتبع قصة الدجال وموعد خروجه والحاجات الل هيعملها آخر الزمان هتكتشف إنّه هيفتن الناس بنفس الحاجات دي بالظبط
١- هيأمرهم بالكفر وده حال الملك الظالم في قصة أصحاب الكهف .... ( فتنة الدين )
٢- هيكون عنده من خيرات وكنوز الدنيا ...يأمر السماء فتمطر ويأمر الأرض فتنبت ويخرج الكنوز من الأرض .....( فتتة المال والغنى )
٣- هيكون عنده نفوذ وقوة ....وده نفس حال قوة ونفوذ الملك الصالح ذي القرنين ( فتنة القوة )
٤- هيبهر الناس بمعلومات وأخبار محدش يعرفها غيره وده نفس قصة سيدنا موسى مع الخضر إنّه لقى شخص أعلم منه ( فتنة العلم )
وعلشان كده الل هيتدبر قصص سورة الكهف بعقله وقلبه وهيفهم السورة عاوزه منه إيه هيكون قادر على الوقوف أمام فتنة الدجال بإذن الله
