عقد العمر
شعر : سوسن رمضان
الصبر مش حلو يا اخوانا
الصبر مر مرار العلقم السادة
الصبر مش طيب
ولا الرضا عبادة
العتمة موت (بين )
للقلب مش لعنيك
للعتمة نور( بيٌن )
لون القلوب حواليك
العتمه ( بتبيّن )
مين أللي قلبه عليك ..
ومبدئيا كده وقبل اي كلام
قلبي انكسر مني علي سلم الايام
والعمر عقده انفرط
ولضمته .. بس بكام ؟
يا ترى أللى ضاع مني ..
هتعوضه الأحلام ؟
والدايرة دوارة
تفرمنا بجدارة
والرحله تفاصيلها
مرسومه بمهاره
وكلامنا يبقي دموع
والحزن زي الجوع
والجوع يا ناس كافر
يوجع اوي ومايبان
يحفر تجاعيده
من غير ما المه يبان
والقلب مين سيده
غير أللي حضنه أمان
والفجر دايما م الرجوع قلقان ..
وفى الختام
انا نفسي اعيش في سلااااااام
سلاااام
