الشريك الذهبي.... بقلم أميره حافظ

هناك تعبير أمريكى اسمه (Gold Partner) أو الشريك الذهبى ماذا يعني هذا التعبير؟ 

معناه بااختصار أن كل واحد فينا حاجة من إثنين:

يا إما فى حياته شخص من ذهب، يا إما هو نفسه شخص من ذهب للى حواليه.

الشريك الذهبي نعمة من ربنا فعلًا لو وُجد... يطلع حبيب... أو يطلع صاحب...أو يطلع زميل عمل ..، المهم إنك ما بتمرش على الدنيا إلا لو قابلته، أو تكون أنت نفسك كدة. هو معاييره فى التعامل مع الناس بتختلف، علشان كدة اتشبه "بالذهب" فميزانه فى تقييم الناس ميزان الذهب.

الشريك الذهب دايمًا بابه مفتوح، ابن أصول، مكسب، مش بيتعوض، بيتخسر مش بيخسر، مش بيصدي، بينصحك لنفسك.

عم أنيس منصور لما سأل عباس العقاد عن إزاى يعرف أهم شخص فى حياته رد عليه العقاد بكلام رائع جدًا..قاله : "مسيره هينصحك ‏" بمجرد ده ما يحصل، إنت دور على مصلحته الشخصية بين كلامه ليك، لو مالقتش، إفهم إنها نصيحة خالصة لمحبتك.

لما تتعود على وجوده هتنسى تدريجيًا أهميته لكن مش بينفيها، ....غيابه عنك سقعة ودور برد رخم مفيش منه شفا....الشريك ده هو اللى اتعملت عشانه جملة:" أنت إزاى كده". 

الناس دي قليلة زى كل حاجة حلوة فى الدنيا، ناس كده تحس إن قلوبهم مغسولة طيبة، وأرواحهم متعطرة خير ومعجونين جدعنة، مش منتظرين منك شكر ولا عايزين غير إنك تكون حلو.. ...نجدة نازلة لك من السما، هدية...تعويض عن خذلان من ناس كتير قريبة منك قربهم فقط إما بصلة دم أو محيط مكان.  

دوّر عليهم وخلّى بالك ليضيعوا وسط كومة الناس الهوا‏ والناس الأي كلام اللى بتتكعبل فيهم ليل نهار، ولو لقيت حد منهم اامسك فيه بإيدك وسنانك وماتسيبهوش، وما تسيبهوش يسيبك...ولو سابك ..اعرف إنك خسرت كتير. 

لو في حياتك Gold Partner ..اعمل له منشن وفرحه .وقوله انت ذهب ... دمتم جواهر في قلوب أحبابكم. 

أميره حافظ