حسام حداد يروي تجربته مع أسترازينيكا: الحمد لله مطلعليش عين تالتة
المصريين بالخارجقال الإعلامي حسام حداد، إنه حصل أمس الأربعاء على لقاح أسترازينيكا، مشيرًا إلى أنه سجل طلب الحصول عليه منذ 4 أسابيع، وحصل عليه في مقر شركة فاكسيرا بمحافظة الجيزة: «الحقنة مش بتوجع، وفي جزء من الثانية أخدت الحقنة، ومفيش فرق بين الكتف الشمال واليمين، أنا سعيد إني حصلت على أسترازينيكا، والحمد لله ماطلعليش عين تالتة ولا حاجة».
وأضاف حداد خلال تقديمه حلقة اليوم من برنامج برنامج «صباح الخير يا مصر»، الذي يعرض عبر القناة الأولى، والفضائية المصرية: «كنت متوقع نوعا من أنواع اللغبطة في التعامل، ولما دخلت سلمت بطاقتي لسيدتين تعملان في فاكسيرا لتسجيل كل التفاصيل، والمكان كان جيد التهوية والإنارة مع وجود كراسي ويمكن أن ننتظر في الخارج».
وتابع حسام حداد، أن المعاملة كانت طيبة للغاية: «لما الموظفين بيندهوا على حد ومش بيلاقوه كانوا بيدوروا عليه بره وكل الكلام يا أفندم وحضرتك وفي انتظارك، ولما جه دوري راجعت دكتورة تاريخي الطبي، بعدها رحت للممرضة أو الطبيبة اللي موجودة».
وأردف: «بعد الحصول على اللقاح، حصلت على كارت باسم اللقاح الذي تلقيته وموعد الجرعة الثانية بعد 3 أشهر».
وحول الأعراض، أكد أنها تختلف من جسم لآخر: «أنا أصريت أكون موجود معاكم عشان أحكي التجربة، حسيت بتكسير جسم بسيط مش قوي وفي حالة عامة من الوهن وحاسس إن جسمي ضعيف، وسمعت في الانتظار كم رهيب من الشائعات زي إن أسترازينيكا يتسبب في جلطات والاتحاد الأوروبي مرضيش ياخده فانجلترا خلصت منه وبعتته للدول اللي زينا .. لكن الحقيقة في وزارة صحة ومنظمة الصحة العالمية مش هيطعمونا حاجات تموتنا، إحنا مش فئرات تجارب، وانجلترا طعمت نصف الشعب بأسترازينيكا وبقوا يحضروا مباريات كرة القدم، وعموما كل لقاحات كورونا جيدة وتفيد البشر».