طارق الإمبابي يكتب : عايزين مصر تعيش
بقلم : م. طارق الإمبابي
المرحلة اللي جايه مرحله عمل بدون مجاملات ، مش عايزين كاذبين أو منافقين أو راقصين، عايزين ناس جامدين عاقلين صافيين، عايزين فقط مصريين.
لما أقول مصريين يعني مصر كل شيء في حياته، يعني ممكن يضحي عشان مصر تعيش، مش عايزين هتيفه، مش عايزين صوت عالي، مش عايزين نتكلم إحنا عايزين نتعلم.
تتعلم ازاي تحب بلدك ، مش تبيع وتشتري فيها، مش عايزين نستغل اسمها ونقول أننا بندافع عنها، عايزين صدورنا دروع تدافع عنها، عايزين صدورنا تدفئ البردان، وإيدينا تطعم الغلبان، عايزين نمد أيدينا ونعطي من غير ما هي تطلب.
مش عايزين حد يزايد ، ولا عايزين محايد، عايزينك بس تبقي مصري، شارب من نيلها مش من ميه معدنية، لعبت في حواريها كوره شراب، وشربت من القلة والكوز.
مش عايز تمثل علينا إنك ابن ناس، فكل شعب مصر ولاد ناس طيبين، الفقير منهم قبل الغني بيحب مصر، وكفايه إنه نائم في بيت صغير ، ويتغطي بلحاف مقطع ولابس هدوم قديمه بس نضيف من بره ومن جوه نضيف.
مصري اتغطي بالسما في عز الصيف علي الرصيف ، مصري تعبان بس عمره ما سَبَّهَا ، واستقوي عليها بالعدو قبل الصديق.
راضي بحته جبنه ونص رغيف.
راضي بيها مش بيتاجر بيها بالهتاف والعويل.
عايزين مصر تنضف.
عايزين مصر تعيش.
