بلاش تغامرى
بقلم أ. د فتحى الشرقاوى
إنتي عايزة تبقي مراته؟ ولا عايزه تبقى المعالجة النفسية والسلوكية لحضرته وجنابه وسيادته؟
اختاريلك حاجة من الاتنين دول.
وفكري كويس قوووي قبل ما يتكتب كتابه عليك.
في بنات مخها مضلم، بتشوف إنها تاخد الولد
المضطرب المنحرف واللي فيه كل العبر وتراهن عليه ، وتعاند كل اللي حواليها.
قال إيه!! هتتجوزه وتغيره، وعلى إيديها هيكون حاجه تانيه خالص.
عن البنت المقامرة أتحدث ياجماعة.
القمار مش فلوس وبس، لأ، ممكن يكون القمار في فكرة أو تصرف وياصابت أو ياخابت.
هنتكلم النهارده عن نمط من البنات تلاقيها تختار شاب سيئ جدًا وتقولك أنا بحبه وعلى إيدي هيتغير، وتمر الأيام والسنين ولا اتغير ولا هيتغير.
نصيحتي للبنات اللي كده.. أوعي تراهني على حاجه خسرانه، الجواز معناه تعملي أسرة وأولاد، مش تعيشي عمرك كله أخصائية نفسية لمعالجة نرفزته وانفعالاته وتوتره واندفاعه وبخله واعتماديته وإخصائية تعديل سلوك علشان تعدلي كل دقيقة تصرفاته.
وإخصائية تعديل أفكار واتجاهات علشان كل ثانية تعدلي أفكاره الشاذة واتجاهاته الغلط.
حضرتك لازم تعرفي وتكوني على يقين محدش يقدر يعدل أو يغير حدإلا لما الحد ده يكون عاوز يتغير.
تعيشي عمرك كله على أمل إصلاحه وتغييره، وأنا بقولك مش هيتغير، دي طباع وسمات مغروسه ومعجونه فيه، يارب نفهم.
