في انتظار هذا اللُقَاح

شعر:مصباح المهدي هُوَّه ينفع؟
قال لي: ينفع
بس ينفع قال لي: لأ...
نص طن إجابة لأ
فوق كتافي
قلت له العالم بحاله
رهن فك الشفرة حافي
(في انتظار هذا اللُقَاح)
اللي جاي بالشكل دا
مالهوش معالم
ربي يا عالم بحال العالمين
الدوري راح
الدِّراسة أجِّلُوها
والجوامع والكنايس قفِّلُوها
والمحبَّة قنِّنُوها
والزيارات شيْطنُوها
والشوارع بخَّروها
ياعزيزي
إللي طَلَّعْ دين أبونا
مش كورونا
همَّه واحنا عبيد وسادة
جربونا لقونا أيسر
من خروج رغوة صابونة
زادوا جُرْعَات المعونة.
.ملط خالص قلعونا
حضروا العفريت رَعَبْهُم
مالحقوش ييجوا....... يزورونا
غرقوا في بحر الكورونا
بعد ما بالخوف ملونا
والبلاد اللي استباحوا
دمَّها أخدت أجازة م النزال
المواطن في اليمن 
أو ف الصومال
مش مِرَكِّزْ في الكلام دا
عندو ما عدَّا بسنين ضوئية فيرس
أو وباء
يفعل الله مايشاء
الظلم لأ..
حد مات في صنعا من فيرس كورونا؟
حد في مقديشيو مات؟
رعب قاصد ناس بعينهم
باجتياح ألله يعينهم
واللي ماتوا تحت وابل طيَّاراتهم
في استراحة
ربما يطلع نهار المظلومين
بإيدين كورونا