د"محمد النمر "الإنفلونزا هي الفيروس الأقوي حاليا
فيفى سعيد المصريين بالخارج
دكتور محمد النمر للأطفال وحديثى الولاده
الإنفلونزا هي الفيروس الأقوي حاليا
بعض الحالات تحتاج مضادات وليس كل الحالات خصوصا عند حدوث مضاعفات زي الإلتهاب الرئوي دا تفصيل للحدث الحالى من الزميل الفاضل د محمد غندور
‐ للأسف بقالنا أسبوعين ما بنشوفش يوم عدل في العياده .
- العيال حرارتها ٤٠ ما بتنزلش بالمخفضات ،الحراره ممكن تستمر ٥ ايام كاملين و تتحسن يومين و ممكن بعد ما تتحسن تعلي يومان تاني و بعد كده تروح (عدا لو حصل مضاعفات لا قدر الله ) .
- الكحه رهيبه ما فيش دوا بيوقفها و ممكن تطول أسبوعان تلاته بعد ما الحراره تقف .
- الي بيعرف يعبر من الأطفال دول تلاقيه بيشتكي من وجع في جسمه و عضمه و مفاصله و الام جامده في الزور و صداع .
‐ للأسف العدوي سريعه جدا و ممكن البيت كله يتضرب في يومان .
- كلهم بلا أستثناء تكشف عليهم ما تلاقيش أي حاجه تفسر الأعراض الرهيبه دي .
‐ تحاليلهم كلها بتؤكد انها عدوي فيروسيه ، مع كل الأعراض دي التشخيص غالبا أنفلونزا.
- كالعاده بس الناس بتنسي، كل سنه في الوقت ده ، حالات الإنفلونزا بتزيد ( بما أنه الموسم) . و الأنفلونزا زي أي فيروس المفروض في أغلب الأحوال بيخف لوحده بعد ما ياخد الدوره بتاعته. و في بعض الحالات بيحصل مضاعفات و أشهرها :
ان عدوي بكتيريه انتهازيه تستغل انشغال الجهاز المناعي بمحاربة دور الإنفلونزا و تهاجم الجسم مسببه حاجه من الآتي:
- التهاب الأذن الوسطي
- التهاب الجيوب الأنفيه
- الالتهاب الرئوي
طب احنا المفروض نعمل ايه عشان نحمي نفسنا و أطفالنا من الأنفلونزا و مضاعفاتها :
- نقوي الجهاز المناعي (تغذية سليمه، نوم متوازن، رياضه)
- ناخد تطعيم الإنفلونزا اول ما ينزل كل سنه (بغض النظر عن آراء الناس المتضاربه في الموضوع ده مع احترامي لكل الآراء العلم خلص الموضوع ده. اي بني آدم علي وجه الأرض من سن 6 شهور لازم ياخد التطعيم، خصوصا بعد ما سلالة الH1N1 بقت موجوده في التطعيم) . للأسف السنه دي التطعيم لسه ما نزلش و غالبا مش هينزل قبل نص ديسمبر أول ما ينزل يا ريت نديه و ما نقولش ما الموسم خلص خلاص .
-العيان يعد في البيت يا أخوانا بلاش حضانه بلاش مدرسه بلاش شغل ( بلاش النظريه الانتقاميه بتاعه ما هو لقط الدور منهم لازم أردلهم الصاع صاعين).
- لو الطفل أقل من سن سنتان لما يعييا بلاش نحط التاتش بتاعنا، خديه للدكتور ، لو أكبر من كده ممكن تحاولي معاه الأول لمده يومان بالكتير (سوايل و مخفضات). ما اتحسنش ما تستنيش روحي للدكتور.
- طب روحنا للدكتور و قال غالبا انفلونزا و كتب علاج تحفظي 3 أيام و الطفل ما اتحسنش لازم ترجعي للدكتور تاني ممكن يكون أي حاجه من المضاعفات الي انا قلتها حصلت لا قدر الله الدكتور مش ساحر ممكن يكتب علاج مبدأي و الأمور تتطور (ده طبعا مش معناه ان أحنا نرزع الواد 3 مضادات حيوية من الأول تحسبا للمضاعفات) ده معناه أن أدوار الأنفلونزا اليومين دول ممكن تحتاج أن الدكتور يبص علي الحاله مره و اتنين و تلاته.
- بعد أذنكم ممكن الدكتور يطلب تحاليل دم و أشعة علي الصدر (صدقني مش غاوي يعذبك و أكيد هو مش مشارك في المعمل ولا بياخد عمولة من بتوع الأشعة) هو بس محتاج يشخص احسن عشان يوصف علاج مناسب لمصلحة ابنك أو بنتك. فبعد أذنك أسمع الكلام.
- بيجيلي حالات كتير جديده لأول مره و بالذات في الموسم ده من عند دكاتره كتير بيتابعوا معاهم من زمان بسبب أنه راح الزياره الأولانيه لدكتوره و الطفل ما أتحسنش فقرر يغير الدكتور. أبص علي روشته الدكتور الاقيها قمه في الأحترام. يا سيدي الفاضل أرجع لدكتورك الراجل عمل كل حاجه زي الكتاب ما بيقول و دي مضاعفات واردة معايه و مع غيري من الزملاء الإفاضل. الدور ده ممكن يحتاج استشاره و اتنين و تلاته و ممكن نحتاج حجز في المستشفي كمان. مش معني ان انت جيتلي في مرحله المضاعفات (التهاب الأذن الوسطي أو الالتهاب الرئوي) أن انا الفتك الي جبت التايهه و ان دكتورك ما لقطش الموضوع من الاول لا يا سيدي دي مرحله و دي مرحله صدقني لو كنت روحتله الاستشاره بدل ما تجيلي كان هيعرف برضه و كان هيعمل معاك اللازم.
لو أتبعنا النصائح دي بأذن الله الموسم ده يمر بسلام علينا كلنا و ما نحتاجش نحبس عيالنا أو نخبيهم .