هشام فريد يكتب: إن مع العسر يسر .. مع وليس بعد !!

‎ إن مع العسر يسر .. مع وليس بعد !!
‎لان ( حرف الجر ) مع .. يدل على التزامن وسرعه الفعل ! لانه نازل معاه أهو ! العسر ومعاه اليسر
‎يعنى محدش يقول اتأخر ليه !؟
‎ اما ( حرف الجر ) بعد .. فقد يعنى أنه ممكن يأتى بعد ساعه أو عشره ساعات واللا شهر أو سنه وتفتح أقاويل كتير وتشكيكات !
‎ربنا بيقول أنا معاك أهو ! لحظه بلحظه ومش سايبك ..
‎إن مع العسر يسر .... مع بعض أهو .. بس انت أصبر وأجتهد وفتح عينيك وشوفنى وشوف بدبر ايه ليك انت يا عبدى !؟
‎وشوف رحمتى فين ؟ فين فى اى حته فى العسر اللى نزل عليك ده !
‎عشان الناس اللى بتتلكك وتشكك فى رحمه ربنا وليه اتأخرت !؟ ربنا بيعلمك وبيأهلك وبيجهزك لمرحله وحاجه لا يمكن انك توصلها اللا لما تكون مؤهل ليها وتستحقها !
‎وعشان كده ربنا بيربيك وعايزك تكتسب خبرات وتشوف أشياء على حقيقتها وتقوى عشان تعرف تدخل وتعيش المرحله اللى بعدها !
‎وبدون المحن دى والعسر اللى بينزل مكنتش هتتعلم وتفهم حاجات كانت غايبه عنك وربنا كشفها ليك وفهمك وبكده يخليك قوى وتستحمل أكتر وتبقى قد المرحله الجايه ،.
‎ومع ذلك فربنا نزل رحمته واليسر مع العسر بس انت بقى يا عبد أشكر ربنا وأصبر وأحتسب وتوكل على الله .. عشان تقدر تشوف اليسر ده فى اى حته ! وفين !؟
‎وتقدر تكمل وتنجح بإذن الله وبرضه تشكر ربنا فى كل الأحوال لأن ربنا بيربيك عشان بيحبك وعايز يساعدك وكاتب لك الخير اللى انت ممكن تكون مش شايفه بعقلك .. وفاكره شر
‎رحمه ربنا وسعه كل شىء ..
‎سبحان الله العظيم ..