ياشعب مصر العظيم : احمِ جيشك
إيه العنوان الملخبَط ده ؟
هوَّ مين بيحمي مين !! طيّب يا سيدي - اُجبُر بخاطري واقرأ الموضوع - مِش جايز فيه خُلاصة المعاني ، مشمول بالخلطه الرُستماني.
.. تبدأ مهام الجيش بحماية الدولة من الاعتداء الخارجي، والمحافظة على الحدود البرّية والمياه الإقليمية، والمجال الجوي للدولة.
كما يتدخّل الجيش أحيانًا في حالة فشل أجهزة الأمن المدنية، في السيطرة على الأوضاع الأمنية بداخل الدولة.. كما تتدخل القوات المسلحة أيضًا في حالة وقوع كوارث طبيعية (زلازل/ فيضانات...) كالمساعدة على إخلاء السكان في حالة توقُّع نشاط بركاني .. إضافة لِما يُستجد من ظروف تقتضي الحفاظ علىَ أمن واستقرار الوطن .
ها تقول : ماحنا عارفين الكلام ده .. قصّر وهات م الآخر ، عايز تقول إيه ؟
حاضر يا حضرت الفهّامه .. بس - الأوّل - اسمحلي أسألك : انت عارف ان مصر في حالة حرب ؟
أكيد - مصر في حالة حرب مع الإرهاب - في سيناء
طب ده دور الجيش اللي بيحمي أهلك وناسَك وأرضك وجوّك وبحرك .. عشان تعيش مرفوع الراس ، انتَ بقىَ دورك إيه ؟
انتَ عايزني اشيل سلاح ، واروح أحارب معاهم !!
نعم .. لازم تحارب معاهم - وكُلّنا نحارب معاهم ، والسلاح مِش مدفع ودبابة وطيّاره وغوّاصه .
.. خُد مِنّي المُفيد اللي مالوش تاني ، وفيه خُلاصة المعاني ، بالخلطه الرُستماني
ساحة المعركة مِش سيناء - فقط - كُلّ أرض مصر ساحة معركة
الإرهاب مِش في سيناء - فقط - الإرهاب موجود علىَ كُلّ شبر من أرض مصر
انتَ عارف يعني إيه إرهاب فكري ؟ يعني غسيل دماغ وتغيير نمط وسلوك مجتمع وتدمير للقوّة الناعمة بتسريب أغاني ومسلسلات وأفلام ( تافهه ) ، وتغييب دور الإعلام عن رسالته الحقيقية في تبصير وتنوير الناس !! ... هنا - دورك - في ردع الإرهاب الفكري - بوعيَك
انت عارف يعني إيه إرهاب نفسي ؟ يعني نشر الشائعات ، وبث الإحباط ، وتشويه أي إنجازات في بلدك !! هنا - دورك - في ردع الإرهاب النفسي - بوعيَك
انت عارف يعني إيه إرهاب بيولوجي ؟ يعني إطلاق - مُتعمّد - للفيروسات والبكتيريا والسموم والعوامل الضارة الأخرى التي تسبِّب مرض أو موت لإنسان أو حيوان أو نبات!! هنا - دورك - في ردع الإرهاب البيولوجي - بوعيَك
طب ازّاي ؟؟؟
محاربة أي فكر - هدّام - بمقاطعته ، والتبليغ عنه للجهات المعنية.
اتّخاذ كافة الإجراءات الصحيّة - الوقائية - التي تجعلك في مأمن مِن أي تعرّض لحامِل فيروس .
ملحوظة :
فكّر في الشهيد اللي ضحّىَ بروحه عشان تعيش .. أقلّ تكريم ليه - تحافظ علىَ نفسك (أمنك الشخصي / صحّتك / ثباتك الانفعالي )
.. فكّر في كُلّ إنسان مسؤول عنَّك - يقينك بأن ليك ضهر يحميك - معناه - تكون ضهر وسند لكل جندي وضابط جيش وشرطه .. بوعيك الديني والسياسي والأمني والثقافي والفكري والصحّي ...
.. وافهم انّك مُستهدف - بلاش تكسر ضهر جيشك بجهلك - عدوّك واصِل لإيدك في موبايلك - واصل لبيتك في تليفزيونك - والهدف ( واحد ) تغيير لون دنيتك - لسواد !!
.. وعيك سلاح ، ثقافتك سلاح ، كمامتك سلاح ، تركيزك سلاح ، دعمك لقيادتك السياسية سلاح .. إتقانك لعملك سلاح ، استغفارك لربّك سلاح ، اتّقي الله في نفسك - سلاح .
.. حارب الفقر بإخلاصك وإتقانك في عملك
.. حارب الجهل بعلمك وثقافتك وسلامة تفكيرك
.. حارب المرض بوعيك الصحّي وسلامة بدنك
.. اللي عندُه كُلّ الأسلحه دي - مِش محتاج كلام تاني
عُمر مصر ما تنهزم .. وفيها شعب عظيم
.. والكلّ يستنّاني .. بنّا الكلام موصول .. ها نقول :خُلاصة المعاني بالخلطة الرستُماني
