تعالوا نعيد حساباتنا

 

بقلم / سما رامي 

 

بحلم وأحلامي قد السما بحلم بعالم مليان حاجات كثير..

بحلم ما يكونش في بينا فقير أو إنسان حزين أو طفل بيبكي ومش لاقي حضن..

كل يوم أشوف أخبار واسمع حواديت كتير عن أطفال لقوها في الشوارع ما لهمش أهل ما لهمش حد إيه ذنبهم في حياة اتفرضت عليهم مالهمش أي يد في إللي فات ومايعرفوش مصيرهم إللي جاي..

أسمع حكايات عن أصحاب كانوا بيهزروا واتقلب الهزل لمأساة وواحد فيهم اخد رصاصة بالغلط ومات.. 

 وناس بتكيد لناس ومناصب تغير ناس وصراعات حوالينا كتير

هو العيب في مين ؟

أنا دايما شايفة الدنيا وردى فجأة قلبت ألوان كتير

أحداث كتير وحوادث كتير وييجي فيروس زى كورونا يفكرنا بعجزنا وقلة حيلتنا وإن مهما كان الإنسان واصل بعلمه والبلاد متقدمة بفيرس ضعيف زى كورونا يهدد العالم كله ويوقف حياة بلد كانت بتتفاخر إنها من الدول المتقدمة ييجى فيروس يحبس بلد بحالها

والموت هو الحقيقة الوحيدة إللي بتنهي كل الخلافات دى..

لكن لسة الدنيا بخير لسة في ناس حلوة كتير بتزرع الضحكة والحب والخير في حياة إللي حواليها وبرغم زحمة الحياة و احداثها إلا إننا لازم نكون أقوى ويكون عندنا أمل في رحمة ربنا

وإنه قادر يرفع عنا البلاء و الإبتلاء والأمراض بس نرجع نحب بعض ونحب الخير لبعض

وندعي ربنا كتير ونرحم بعض ونخاف علي بعض وفي شهر فبراير عيد الحب نعمل دعوة للحب حب من غير مصالح..

تعالوا نحب بعض..